ទម្លាប់មិនល្អមួយចំនួន ដែលគួរចៀសវាងនៅកន្លែងធ្វើការ
- news.sabay.com.kh
- Jan 14, 2016
- 1 min read
ក្នុងបរិយាកាសការងារ គេតែងឃើញមាន បុគ្គលិកខ្លះ មានទម្លាប់ល្អ មានទំនាក់ទំនងល្អក្នុងការងារ ឥរិយាបថថ្លៃថ្នូរសមរម្យ ភាពវៃឆ្លាត ចេះបត់បែនតាមកាលៈទេសៈ ធ្វើឲ្យការងារស្ថាប័នក្រុមហ៊ុនរីកចម្រើនជាលំដាប់។ តែផ្ទុយទៅវិញ ក៏មានទម្លាប់មិនល្អខ្លះ កើតចេញពីបុគ្គលិកមួយចំនួន ដែលជះឥទ្ធិពលមិនល្អដល់ អ្នកដទៃ ធ្វើឲ្យការងាររអាក់រអួល។ អ្នកជំនាញជាច្រើន ក៏បានណែនាំឲ្យបុគ្គលិកគួរចៀសវាងទម្លាប់ទាំងនោះដូចជា៖
១. មាត់ចាប មាត់ព្រាប និយាយមិនល្អពីអ្នកដទៃ
និយាយដើមអ្នកដទៃ ជារឿងមិនសមរម្យមួយ មិនថានៅក្នុងក្រុមហ៊ុនកន្លែងធ្វើការឬ ទីកន្លែងផ្សេងៗទៀត ទោះក្នុងគោលបំណងបែបណាក៏ដោយ។ និយាយខុសពីការពិត លើកព័ត៌មានមិនច្បាស់លាស់ នៅពេលគេដឹង អាចធ្វើឲ្យគេអាក់អន់ចិត្ត ធ្វើឲ្យទំនាក់ទំនងក្នុងការងារមានភាពរង្គោះរង្គើ។
២. លួចចម្លងគំនិតពីគេ
ធ្វើការជាមួយ មិត្តរួមក្រុមការងារ ប៉ុន្តែអ្នកមិនបានបញ្ចេញគំនិតផ្ទាល់ខ្លួន បែរជាលួចយកគំនិតពីគេទៅធ្វើ។ ទោះបីវាជារឿងតូចមួយ តែធ្វើឲ្យទំនាក់ទំនងមិត្តភ័ក្ដិរួមការងារ មានការអន់ចិត្ត មើលមុខគ្នាមិនចំ នាំឲ្យខ្សែសង្វាក់ការងារជាក្រុមមិនរលូនទៅមុខ។
៣. ត្អូញត្អែរឮៗពីការងារ កំពុងធ្វើ ពាក្យត្អូញត្អែរ បង្ហាញកាយវិការថាស្អប់តួនាទី ការងារកំពុងធ្វើ ដោយគ្មានហេតុផលត្រឹមត្រូវ ជារឿងមួយធ្វើឲ្យ អ្នកដទៃ ឬបុគ្គលិកធ្វើការជាមួយចាត់ទុកមកក្នុងផ្លូវមិនល្អ ដោយនាំយកអារម្មណ៍មិនល្អចូលកន្លែងការងារ ប៉ះពាល់ដល់បុគ្គលិកផ្សេងៗ។ បុគ្គលិកនោះ នឹងអាចត្រូវគេបញ្ឈប់ការងារ ដោយមិនអាចរីកចម្រើនក្នុងតួនាទី សម្រាប់ការអភិវឌ្ឍស្ថាប័ន ឬក្រុមហ៊ុន។
៤. និយាយអួតអាង
និយាយលើកតម្កើងពីខ្លួនឯងនៅកន្លែងការងារ ជាហេតុផលមួយធ្វើឲ្យអ្នកដទៃមិនចូលចិត្ត។ បុគ្គលិកមួយចំនួនគិតថាខ្លួនអាចធ្វើការងារអ្វីបានល្អប្រសើរជាងអ្នកដទៃ ទាំងការងារមិនបានបង្ហាញលទ្ធផលអ្វីជាដុំកំភួន ធ្វើឲ្យអ្នកក្នុងក្រុមការងារមិនចង់សហការជាមួយ។
៥. កុហក លេងសើចខុសទំនង
ចូលចិត្តនិយាយលេងសើចក្នុងការងារហួសហេតុ និយាយលេង និយាយកុហក គួរបញ្ឈប់ទម្លាប់បែបនោះ។ តាមការស្រាវជ្រាវជាច្រើនបង្ហាញថា ទម្លាប់លេងសើចច្រើនក្នុងការងារ ធ្វើឲ្យបាត់បង់ទំនុកចិត្តពីអ្នករួមការងារ និងប៉ះពាល់អារម្មណ៍ដល់បុគ្គលិករួមការងារមួយចំនួន៕
Comments