ប្រអប់ស្នោដាក់អាហារក្ដៅ គ្រោះថ្នាក់បំផុតចំពោះសុខភាព
- news.sabay.com.kh
- Aug 21, 2015
- 1 min read
អាហារស្ទើរទាំងអស់បានប្រើប្រអប់ស្នោជាមធ្យោបាយវេចខ្ចប់ ព្រោះមានភាពងាយស្រួលទទួលទាន ប៉ុន្តែបើតាមការចុះផ្សាយលើគេហទំព័រ Mamas Health របស់សហរដ្ឋអាមេរិកបានបញ្ជាក់ថា ប្រើប្រអប់ស្នោវេចខ្ចប់អាហារក្ដៅ អាចបង្កគ្រោះថ្នាក់ធ្ងន់ធ្ងរបំផុតចំពោះសុខភាព។
កម្ដៅចេញពីអាហារដែលក្ដៅខ្លាំង អាចធ្វើឲ្យរលាយប្រអប់ស្នោបាន ប៉ុន្តែពេលខ្លះវាមិនបង្ហាញឲ្យឃើញជាក់ស្ដែងឡើយ។ សារជាតិដែលរលាយចេញពីប្រអប់ស្នោនោះ អាចប៉ះពាល់យ៉ាងធ្ងន់ធ្ងរដល់សុខភាពអ្នកប្រើប្រាស់។
អ្នកទទួលទានអាហារលាយជាមួយសារជាតិរលាយចេញពីប្រអប់ស្នោ អាចមានអាការឈឺក្បាល និងមានបញ្ហាក្រពះដែលស្ដែងចេញតាមរយៈការភើ និងក្អួតចង្អោរ ព្រមទាំងរាគ ក្នុងពេលបន្តិចក្រោយមក។ ក្រៅពីនេះ វាក៏អាចបង្កបញ្ហាដល់ក្រលៀនផងដែរ។
ប្រអប់ស្នោ និងចានស្នោ មិនត្រឹមតែប៉ះពាល់ដល់សុខភាពមនុស្សប៉ុណ្ណោះ ប៉ុន្តែវាក៏អាចផ្ដល់ផលអាក្រក់ចំពោះបរិស្ថានផងដែរ។ ផលិតផលស្នោទាំងនេះផលិតចេញពីសារជាតិប៉ូលីស្ទីរ៉ែន ដែលមិនរលាយចេញពីផែនដីឡើយ។ ចាប់ពីថ្ងៃទី១ ខែកក្កដាមក ក្រុងញូវយ៉ក សហរដ្ឋអាមេរិក បានហាមឃាត់ការប្រើប្រាស់ កែវ ចាន ប្រអប់ស្នោទាំងអស់ ព្រោះខ្លាចប៉ះពាល់ដល់សុខភាព និងបរិស្ថាន៕
Comments