ដើម្បីជៀសវាងការស្ដាយក្រោយ គួរអនុវត្តទម្លាប់ល្អ ៦ យ៉ាងនេះមុនពេលឈានដល់វ័យ៣០
- thebnews.com
- Jun 12, 2015
- 1 min read
ជាទូទៅវ័យខ្ទង់២០ គឺភាគច្រើនចូលចិត្តការសប្បាយ និង គិតធ្វើអ្វីដែលពួកគេចង់ធ្វើ ដោយមិនចង់ឲ្យអ្នកដទៃគាបសង្កត់ ឬ ដាក់សម្ពាធអ្វីឡើយ។ ប៉ុន្តែនៅពេលឈានជិតដល់វ័យខ្ទង៣០ឆ្នាំ ការផ្លាស់ប្ដូរឥរិយាបថ ឬ ទម្លាប់មួយមិនល្អមួយចំនួនគួរតែធ្វើឡើង បើទោះបីជាមិនចង់ក្តី។ បើគ្មានការផ្លាស់ប្ដូរណាមួយទេនោះ អនាគតដ៏ល្អមួយអាចមិនដូចអ្វីជាការរំពឹងទុករបស់អ្នកបាន។
ដូច្នេះហើយ ប្រសិនមុនពេលឈានដល់វ័យ ៣០ប្លាយនេះ អ្នកត្រូវតែព្យាយាមធ្វើបង្កើតទម្លាប់ល្អៗ មួយចំនួនខាងក្រោម ដើម្បីអភិវឌ្ឍខ្លួនឲ្យប្រសើរ៖ ១) រៀនសូត្រអំពីភាពបរាជ័យរបស់ខ្លួន ទម្រាំអ្នកឈានជើងមកដល់ថ្ងៃនេះ គឺមានការបរាជ័យទាំងតូចទាំងធំជាច្រើន ។ ថ្វីត្បិតតែ គ្មាននរណាម្នាក់ពេញចិត្តនឹងភាពបរាជ័យ ប៉ុន្តែវាមិនងាយនឹងជៀសផុតនោះឡើយ ព្រោះមនុស្សមិនមែនជាទេវតា។ អ្វីដែលសំខាន់បំផុត ដើម្បីរៀបចំខ្លួនដើរទៅរកផ្លូវជោគជ័យ អ្នកពិតជាមិនអាចបដិសេធបានឡើយ ចំពោះការរៀនសូត្រពីភាពបរាជ័យកន្លងមក។ ការបរាជ័យ មិនអាចកើតឡើងនោះទេ ប្រសិនបើគ្មានកំហុសឆ្គង ឬ ចំណុចខ្សោយណាមួយ ដូច្នេះហើយអ្នកត្រូវពិនិត្យឡើងវិញ ថាអ្វីជាមូលហេតុសំខាន់ដែលនាំឲ្យអ្នកបរាជ័យនាពេលកន្លងមក ហើយគួរប្រើយុទ្ធសាស្ត្របែបណា ដើម្បីកុំឲ្យមានប្រវត្តិសាស្ត្រច្រំដែល។
២) គិតឲ្យច្បាស់មុននឹងសម្រេចធ្វើអ្វីមួយ ដើម្បីធ្វើអ្វីមួយឲ្យជោគជ័យ វាជៀសមិនផុតអំពីការប្រថុយនោះទេ ជាពិសេសសម្រាប់អ្នកដែលធ្វើជំនួញ។ ប៉ុន្តែមិនមែនមានន័យថា អ្នកចេះតែប្រថុយគ្រប់យ៉ាងដោយគ្មានការគិតគូរច្បាស់លាស់នោះទេ។ មានន័យថា មុនពេលសម្រេចចិត្តធ្វើអ្វីមួយ អ្នកត្រូវតែគិតគូរឲ្យបានវែងឆ្ងាយ និង ស្រាវជ្រាវឲ្យបានច្បាស់ ព្រោះកាលណាអ្នកព្យាយាមធ្វើបែបនេះ វានឹងជួយឲ្យបញ្ហាដែលអាចកើតឡើង ស្ថិតក្នុងកម្រិតតូចតាច ឬ អាចគ្រប់គ្រងបាន។ បើមិនធ្វើបែបនេះទេ នោះវានឹងមានបញ្ហាកើតឡើងជាច្រើនមិនខាន ហើយពេលខ្លះវាពិតជាពិបាកក្នុងការកែប្រែស្ថានភាពខ្លាំងណាស់ ស្របពេលដែលវ័យកាន់តែចាស់ជាងមុន។
៣) បន្តការរៀនសូត្រ គ្មាននរណាម្នាក់ ចេះគ្រប់យ៉ាងនោះទេ។ មនុស្សពិតជាត្រូវការស្វែងយល់ និង រៀនសូត្របន្ថែមជារៀងរាល់ថ្ងៃ ដើម្បីឆ្លើយតបទៅនឹងស្ថានការណ៍ដែលប្រែប្រួលមិនទៀងទាត់។ កាលណាអ្នកគ្មានការចេះដឹង និង ព័ត៌មានថ្មីៗគ្រប់គ្រាន់ទេនោះ វាពិតជាគ្រោះថ្នាក់ខ្លាំងណាស់ ព្រោះបរាជ័យអាចនឹងកើតឡើងគ្រប់ពេល ដោយសារតែការសម្រេចចិត្តដែលគ្មានមូលដ្ឋានច្បាស់លាស់។ ដូច្នេះហើយ អ្នកត្រូវតែបន្តការរៀនសូត្រជានិច្ច ទោះបីជាស្ថិតក្នុងស្ថានភាពណាក៏ដោយ។
៤) បង្កើតទំនាក់ទំនង និង រៀនសូត្រពីបុគ្គលជោគជ័យ
ដើម្បីក្លាយជាមនុស្សជោគជ័យម្នាក់ វាពិតជាមានសារសំខាន់ខ្លាំងណាស់ ដែលត្រូវស្វែងយល់ និង រៀនសូត្រពីមនុស្សជុំវិញខ្លួន ជាពិសេសបុគ្គលជោគជ័យ ឬ បុគ្គលទាំងឡាយណាដែលអាចផ្តល់ជាចំណេះដឹង ឬ បទពិសោធន៍ល្អៗសម្រាប់ការអភិវឌ្ឍន៍ខ្លួនរបស់អ្នក។ ដូច្នេះកុំចំណាយពេលច្រើនពេក ជាមួយប្រភេទមនុស្សដែលមិនល្អ ឬ មនុស្សដែលមិនសូវខ្វាយខ្វល់ពីអនាគតរបស់ពួកគេ ព្រោះអ្នកអាចនឹងមានលទ្ធផលស្រដៀងគ្នាដែរ។
៥) សន្សំ និង វិនិយោគសម្រាប់អនាគត
មុនពេលឈានដល់អាយុ ៣០ឆ្នាំបា្លយមកដល់ អ្នកមិនគួរមើលរំលងអំពីការសន្សំប្រាក់កាសទុកឲ្យបានច្រើនឡើយ។ ទោះបីជា មានប្រាក់ខែខ្ពស់ ឬ ចំណូលច្រើនប៉ុណ្ណាក៏ដោយ ប៉ុន្តែបើមិនសន្សំទុកនោះទេ អ្នកនៅតែគ្មានសល់ប្រាក់អ្វីជាដុំកំភួន ជាពិសេសនៅពេលត្រូវដោះស្រាយបញ្ហាសំខាន់ៗ។ ប្រាក់ដែលបានមកពីការសន្សំនេះ អ្នកអាចប្រើប្រាស់លើការវិនិយោគ ឬ បើកជំនួញផ្សេងៗ ទៅតាមការចង់បាន ព្រោះថា ការធ្វើបែបនេះ វាអាចជួយឲ្យអ្នកកាន់តែមានជីវភាពធូរធារ។
៦) យកចិត្តទុកដាក់លើសុខភាព
មនុស្សភាគច្រើនខ្វះការយកចិត្តទុកដាក់លើសុខភាព ដែលជាចំណុចដ៏សំខាន់បំផុតនៅក្នុងជីវិតមនុស្សម្នាក់ៗ។ ទោះបីជា មានលុយច្រើន ឬ ចំណេះដឹងខ្ពស់ប៉ុណ្ណាក៏ដោយ តែបើគ្មានសុខភាពល្អទេ នោះវាស្មើនឹងជីវិតគ្មានន័យ។ សូមកុំធ្វេសប្រហែសលើបញ្ហាសុខភាពឲ្យសោះ៕
Comments