ទម្លាប់ល្អៗ៥យ៉ាងដែលលោកអ្នកមិនគួរមើលរំលងក្នុងពេលអង្គុយធ្វើការ!
- thebnews.com
- Jun 11, 2015
- 1 min read
ជាធម្មតានៅពេលដែលអ្នកអង្គុយធ្វើការនៅ ការិយាល័យជាច្រើនម៉ោងក្នុងមួយថ្ងៃៗនោះ វាធ្វើឲ្យអ្នកមានបញ្ហាជាច្រើន ជាពិសេសនោះគឺការឈឺខ្នង កញ្ចឹងក និង ស្ពឹកស្រពន់ដៃជើងជាដើម។ ប្រសិនបើអ្នកតែងតែជួបបញ្ហានេះ អ្នកគូររកវិធីដើម្បីកែខៃឲ្យអ្វីៗប្រសើរឡើងវិញ ព្រោះវាមានសារៈសំខាន់ខ្លាំងណាស់ សម្រាប់ផលិតភាពការងារ និង សុខភាពរបស់អ្នក។ ដើម្បីជៀសវាងបញ្ហាជាច្រើន ដែលបណ្តាលមកពីការអង្គុយធ្វើការក្នុងការិយាល័យយូរពេកនោះ អ្នកត្រូវតែ បង្កើតឥរិយាបថល្អមួយចំនួនដូចខាងក្រោម៖
១) ទម្លាប់អង្គុយឲ្យត្រង់ខ្លួន អ្នកមិនគួរអង្គុយធ្វើការ ដែលមានសភាពវៀចខ្លួននោះទេ ព្រោះវាបង្កឲ្យអ្នកឆាប់ឈឺចាប់ត្រង់ចង្កេះ ឬ ខ្នងជាពិសេសនៅពេលដែលអ្នកធ្វើការច្រើនម៉ោងជាប់គ្នា។ ដើម្បីបញ្ចៀសបញ្ហានេះ អ្នកគួរបង្កើតទម្លាប់អង្គុយឲ្យបានត្រង់ខ្លួន។
២) ប្រើកៅអីដែលអាចបត់បែនបាន ជាធម្មតាទេ នៅពេលដែលអ្នកអង្គុយធ្វើការតែមួយកន្លែងយូរពេកក្នុងការិយាល័យ ធ្វើឲ្យអ្នកមានអារម្មណ៍ឈឺខ្នង។ ប្រសិនបើអ្នកប្រើប្រាស់កៅអីធម្មតានោះ វាមិនអាចជួយអ្វីច្រើនដល់អ្នកនោះទេ។ ដូច្នេះជម្រើសដ៏ល្អ អ្នកគួរជ្រើសរើសកៅអីណាដែលអាច បត់បែនតាមកម្រិតដែលចង់បាន។ មានន័យថា កៅអីប្រភេទនេះ អាចជួយឲ្យអ្នកកាត់បន្ថយការឈឺខ្នងបានច្រើន នៅពេលដែលផ្អែកនៅលើវា។
៣) លាតដៃឲ្យត្រង់ និង ស្មើគ្នាលើ Keyboard កុំព្យូទ័រ មានមនុស្សជាច្រើន ជួបប្រទះបញ្ហាឈឺចាប់ ឬ ចុករមួលសន្លាក់ដៃ ដូចជា ឈឺកដៃ ឬ ម្រាមដៃ នៅពេលដែលពួកគេវាយអត្ថបទជាច្រើនម៉ោង។ ហេតុផលសំខាន់ ដែលបណ្តាលឲ្យមានបញ្ហានេះ គឺមកពី ខ្វះចំណេះដឹងក្នុងការដាក់ដៃលើ Keyboard ។ នៅពេលដែលវាយអត្ថបទផ្សេងៗនោះ អ្នកគួរតែដាក់ដៃទាំងពីររបស់អ្នកឲ្យបានត្រង់ និង ស្មើគ្នាលើ Keyboard ហើយស្ថិតនៅចម្ងាយសមល្មមសម្រាប់អ្នក មានន័យថា មិនគួរប្រើ Keyboard នៅចម្ងាយឆ្ងាយពីដៃអ្នកពេក និងជិតពេកនោះទេ។ ការដាក់ដៃឲ្យត្រូវទីតាំង អាចជួយឲ្យអ្នកអាចជៀសវាង ការឈឺចាប់សន្លាក់ដៃ ដែលបណ្តាលមកពីចលនានៃការវាយអត្ថបទផ្សេងៗ។
៤) រក្សាលំនឹងក្បាលឲ្យសមស្រប នៅពេលដែលធ្វើការ មានមនុស្សជាច្រើនតែងត្អូញត្អែរថា មានអាការៈឈឺកញ្ចឹងក។ បញ្ហានេះ បណ្តាលមកពីកង្វះការរក្សាលំនឹងក្បាល។ អ្នកគួរតែព្យាយាមរក្សាលំនឹងឲ្យបានល្អ ដោយរក្សាលំនឹងត្រង់ចំណុចណាមួយដែលអ្នកគិតថា ល្អសម្រាប់អ្នក ជាពិសេសរាល់ពេលសម្លឹងមើលកុំព្យូទ័រតែម្តង ពោលគឺ មិនត្រូវឈ្ងោកក្បាលពេក ឬ ងើយពេកនោះទេ ព្រោះប្រការនេះអាចធ្វើឲ្យអ្នកមានបញ្ហាឈឺកញ្ចឹងកជាមិនខាន។
៥) ឆ្លៀតពេលសម្រាក និង ធ្វើចលនា ខណៈអ្នកកំពុងធ្វើការជាច្រើននោះ វាជៀសមិនផុតពីការឈឺចុកចាប់នៅតាមសន្លាក់ដៃជើងផ្សេងៗនោះទេ ដូច្នេះអ្នកមិនគួរបន្តធ្វើការទៀតឡើយ។ មានន័យថា អ្នកគួរសម្រាកបន្តិចសិន ដើម្បីយកពេលនេះមកធ្វើចលនាដៃជើង និង ដងខ្លួនឲ្យមានលក្ខណៈប្រសើរជាងមុនវិញ៕
Comments