ចង់បំពេញការងារឲ្យរហ័ស និង មានប្រសិទ្ធភាព គួរអនុវត្តគន្លឹះចំនួន ៤នេះ!
- thebnews.com
- Jun 11, 2015
- 1 min read
មនុស្សភាគច្រើនពិតជា ចង់ក្លាយជាមនុស្សម្នាក់ដែល ធ្វើការងារបានរហ័ស និងប្រកបដោយគុណភាព នាំឲ្យអ្វីៗទទួលបានជោគជ័យសមតាមបំណង។ ប៉ុន្តែវាមិនមែនជារឿងងាយស្រួលឡើយ ដូច្នេះហើយ បានជា ភាពបរាជ័យតែងតែកើតមានឡើងជាហូរហែ មិនចេះចប់។ ហេតុដូច្នេះហើយ ដើម្បីធ្វើបំពេញការងារបានយ៉ាងរហ័ស ប្រកបដោយប្រសិទ្ធភាពខ្ពស់នោះ អ្នកគួរអនុវត្តគន្លឹះសំខាន់ៗខាងក្រោម៖
១) រក្សាថាមពលឲ្យបានរឹងមាំ ដើម្បីអាចធ្វើការងារអ្វីមួយយ៉ាងជោគជ័យ វាពិតជាមានភាពចាំបាច់ដែលត្រូវមានថាមពលរាងកាយ ឲ្យបានគ្រប់គ្រាន់ ព្រោះការងារមិនអាចបញ្ចប់ទៅដោយងាយឡើយប្រសិនបើអ្នកគ្មានថាមពល ឬ កម្លាំងគ្រប់គ្រាន់។ ការឆាប់អស់កម្លាំង ឬ ថាមពលលឿនពេកនេះ ធ្វើឲ្យផលិតភាពការងាររបស់អ្នកធ្លាក់ចុះ ហើយវាពិតជាផ្តល់អវិជ្ជមានយ៉ាងខ្លាំង។ ដើម្បីដោះស្រាយបញ្ហានេះ អ្នកគួរតែគិតគូរសម្រាកឲ្យបានគ្រប់គ្រាន់ ព្រោះបើអ្នកមិនយកចិត្តទុកដាក់ទេ នោះប្រាកដជានាំឲ្យសុខភាពចុះខ្សោយមិនខាន។ លើសពីនេះទៀត អ្នកគួរជៀសវាងការប្រើប្រាស់គ្រឿងស្រវឹង ហើយព្យាយាមបរិភោគអាហារដែលមានប្រយោជន៍សម្រាប់រាងកាយ។ មួយវិញទៀត អ្នកគួរឆ្លៀតពេលហាត់ប្រាណយ៉ាងទៀតទាត់។ ចំណុចទាំងអស់នេះ សុទ្ធតែមានប្រយោជន៍យ៉ាងខ្លាំងសម្រាប់ ការរក្សាថាមពលដើម្បីបំពេញការងារប្រកបដោយប្រសិទ្ធភាព។
២) កាត់បន្ថយការប្រើប្រាស់សម្ភារៈដែលធ្វើឲ្យអ្នកបែកអារម្មណ៍ បច្ចុប្បន្ននេះ ដោយសារតែបច្ចេកវិទ្យាមានលក្ខណៈទំនើប និង ទាន់សម័យដូច្នេះហើយបានជា មនុស្សសឹងគ្រប់គ្នាទៅហើយបានប្រើប្រាស់ឧបករណ៍ និង របស់របរប្រើប្រាស់ជាប់នឹងខ្លួន ជាពិសេសទូរស័ព្ទ។ ឧបករណ៍ទាំងអស់នេះហើយ ធ្វើឲ្យអ្នកមិនអាចមានអារម្មណ៍ពេញលេញ ក្នុងការធ្វើការងារណាមួយយ៉ាងពេញដៃពេញជើងនោះឡើយ ជាហេតុនាំឲ្យលទ្ធផលមិនអាចទទួលមានលទ្ធផលល្អ។
៣) ធ្វើការងារទៅតាមអាទិភាព ក្នុងមួយថ្ងៃៗ មានកិច្ចការជាច្រើនដែលមនុស្សម្នាក់ៗត្រូវការធ្វើ ដូច្នេះដើម្បីប្រាកដជា អាចបំពេញការងារបានយ៉ាងរហ័ស និង មានប្រសិទ្ធភាពនោះ វាទាមទារឲ្យអ្នកចេះបែងចែក និង យល់ច្បាស់ថា អ្វីដែលសំខាន់ និង អ្វីដែលមិនសំខាន់ មានន័យថា ការងារមួយណាជាអាទិភាព។ បើអ្នកមិនអាចបែងចែកនោះទេ វានឹងធ្វើឲ្យអ្នកមានភាពស្មុគស្មាញយ៉ាងខ្លាំង ព្រោះតែការធ្វើការងារមិនច្បាស់លាស់ និង គ្មានគោលដៅបែបនេះ។
៤) គ្រប់គ្រងពេលវេលាឲ្យបានល្អ ការគ្រប់គ្រងពេលវេលា ពិតជាមានសារសំខាន់ខ្លាំងណាស់ក្នុងការធ្វើការងារផ្សេងៗ។ គ្មាននរណាម្នាក់ មានពេលវេលាលើសពី២៤ម៉ោង ក្នុងមួយថ្ងៃនោះឡើយ ដូច្នេះការធ្វើការងារមានប្រសិទ្ធភាព និង ជោគជ័យឬអត់ វាអាស្រ័យលើការគ្រប់គ្រងពេលវេលាប៉ុណ្ណោះ។ មានន័យថា បើមិនចេះ គ្រប់គ្រងពេលវេលាឲ្យបានល្អនោះទេ អ្នកនឹងមិនអាចសម្រេចបានឡើយ៕
Comments