ចង់ព្យាបាលការក្តៅខ្លួន ដោយមិនប្រើថ្នាំ គួរតែគិតគូរ ដល់ចំណីអាហារដែរ
- www.health.com.kh
- May 29, 2015
- 1 min read
បើសិនជាអ្នក កំពុងតែជួបបញ្ហាក្តៅខ្លួន អ្នកពិតជាចង់ឱ្យអាការៈនេះ បាត់ទៅវិញ ឱ្យបានលឿនបំផុតហើយ។ ការក្តៅខ្លួន ឬឡើងកម្តៅក្នុងរាងកាយ ត្រូវបានគេជឿថា វាជាការភ្ញោច ទៅលើប្រព័ន្ធការពាររាងកាយ ដើម្បីប្រឆាំងនឹងភ្នាក់ងារបង្កជំងឺ។ ដូច្នេះ មានហេតុផលល្អៗមួយចំនួនដែលថា ការក្តៅខ្លួន គឺជារឿងធម្មតា។ ទោះបីជាយ៉ាងណាក៏ដោយ បើអ្នកពិតជាចង់ គ្រប់គ្រងការក្តៅខ្លួនរបស់ខ្លួនឯង ឬកូនមែននោះ អ្នកក៏អាចជ្រើសរើស នូវវិធីព្យាបាល ដូចខាងក្រោមនេះបានដែរ។
កាត់បន្ថយការញ៉ាំ សុភាសិតចាស់មួយនិយាយថា “ផ្តាសាយឱ្យញ៉ាំ ក្តៅខ្លួនឱ្យតម” ពិតជារឿងត្រឹមត្រូវណាស់។ អ្នកពិតជាមិនចង់ ចំណាយថាមពលរាងកាយ ដើម្បីរំលាយអាហារ នៅពេលថាមពលត្រូវការ ដើម្បីគ្រប់គ្រងការបង្ករោគ ដែលកំពុងតែធ្វើឱ្យក្តៅខ្លួនឡើយ។
ញ៉ាំផ្លែឈើ ដែលផ្តល់សុខភាព ចូរជ្រើសរើសផ្លែឈើដូចជាបឺរី ឪឡឹក ក្រូច និងត្រសក់ស្រូវ ព្រោះផ្លែឈើទាំងនេះ សម្បូរទៅដោយវីតាមីន C សម្រាប់ជួយប្រឆាំងនឹងការបង្ករោគ និងបន្ថយកម្តៅ។ វាក៏ជួយបង្គ្រប់ជាតិទឹក ក្នុងខ្លួនដែរ។ ចូរចៀសវាងអាហារ ដែលសម្បូរជាតិខ្លាញ់ និងប្រេងច្រើន ដូចជាអាហារប្រភេទសាច់អាំង ឬចៀន។ ចូរចៀសវាងអាហារហឹរ។
ញ៉ាំស៊ុប អ្នកក៏អាចទទួលទានស៊ុបមាន់ ជាមួយបាយ និងបន្លែមួយចំនួនបានដែរ។ ការសិក្សាបានឱ្យដឹងថា ស៊ុបមាន់ ប្រហែលជាមានសមាសធាតុជាថ្នាំច្រើនយ៉ាង ព្រមទាំងបង្គ្រប់ជាតិទឹក ក្នុងខ្លួនបានទៀតផង។ ចូរប្រាកដថា អ្នកបានបញ្ចូលគ្រឿងផ្សំ ក្រៅពីសាច់មាន់ល្អៗ និងងាយស្រួលរំលាយដែរ។
ញ៉ាំទឹកឱ្យបានច្រើន ការក្តៅខ្លួន អាចបណ្តាលឱ្យខ្សោះជាតិទឹក ដែលអាចធ្វើឱ្យអ្នកជំងឺកាន់តែធ្ងន់ធ្ងរទៅៗបាន។ ចូរចៀសវាងការខ្សោះជាតិ តាមរយៈការញ៉ាំទឹកឱ្យបានច្រើន ឬទឹកអូរ៉ាលីត្រឱ្យបានច្រើនវិញ។ ចូរទាក់ទងទៅគ្រូពេទ្យ មុនពេលអ្នកធ្វើរឿងនេះ និងសុំដំបូន្មានពីគាត់ផង។ ចូររៀបចំជាមួយនឹង តារាងរោគសញ្ញា និងចំនួនអាហារដែលអ្នក ឬកូនអ្នកញ៉ាំ ផឹក និងក្តៅខ្លួនខ្លាំងប៉ុណ្ណា សម្រាប់ប្រាប់គ្រូពេទ្យផង។ ជាមួយគ្នានេះដែរ ចូរតាមដានថាតើ អ្នកឧស្សាហ៍ផ្លាស់ប្តូរខោទឹកនោម ឱ្យកូនច្រើនប៉ុណ្ណា និងតើគេនោមញឹកញាប់ប៉ុណ្ណាដែរ។ • បើសិនជាអ្នកបំបៅដោះកូន ចូរបន្តបំបៅដោះឱ្យ បានច្រើនបំផុត តាមតែអាចធ្វើបាន។ • ក្មេងប្រហែលជាចូលចិត្តដុំទឹកកក។ ចូរចៀសវាង ការឱ្យគេញ៉ាំអាហារ មានជាតិផ្អែមច្រើនពេក និងបន្តញ៉ាំទឹកឱ្យបានច្រើន៕
Comments